Deu 2 | Ndebele | STEP | Sasesiphenduka, sasuka saya enkangala, indlela yoLwandle oluBomvu, njengokutsho kweN kosi kimi; njalo sayibhoda intaba yeSeyiri insuku ezinengi .

Deuteronomy 2

Inkulumo kaMozisi isaqhubeka

1 Sasesiphenduka, sasuka saya enkangala, indlela yoLwandle oluBomvu, njengokutsho kweNkosi kimi; njalo sayibhoda intaba yeSeyiri insuku ezinengi ^a. 2 INkosi yasikhuluma kimi isithi: 3 Selibhode intaba le okweneleyo; phendukelani lina enyakatho ^b. 4 Balaye-ke abantu usithi: Lidabula umngcele wabafowenu, abantwana bakaEsawu ^c abahlala eSeyiri ^d. Njalo bazalesaba, ngakho lizinanzelele kakhulu, 5 lingalwi labo; ngoba kangiyikulinika okwelizwe labo, lelingangokunyathela kwangaphansi konyawo ^e, ngoba ngimnikile uEsawu intaba yeSeyiri ibe yilifa ^f. 6 Lizathenga ukudla kubo ngemali ukuze lidle, lithenge kubo lamanzi ngemali ukuze linathe. 7 Ngoba iNkosi uNkulunkulu wakho ikubusisile emsebenzini wonke wesandla sakho; iyazi ukuhamba kwakho kulinkangala enkulu. Le iminyaka engamatshumi amane iNkosi uNkulunkulu wakho ibilawe, kawuswelanga lutho ^g. 8 Uba sisedlula sisuka kubafowethu, abantwana bakaEsawu abahlala eSeyiri ^h, ngendlela yegceke sisuke eElathi ⁱ njalo sisuka eEziyoni-Geberi ^j, saphenduka, sadlula ngendlela yenkangala yakoMowabi. 9 INkosi yasisithi kimi: Ungahlukuluzi uMowabi, ungalwi labo empini; ngoba kangiyikukunika okwelizwe labo kube yilifa ^k, ngoba ngibanikile abantwana bakaLothi iAri ^l ibe yilifa ^m. 10 Kwakuhlala khona endulo amaEmi, abantu abakhulu, labanengi, labade ⁿ, njengamaAnaki ^o; 11 babebalwa njengeziqhwaga labo njengamaAnaki, kodwa amaMowabi ababiza ngokuthi ngamaEmi ^p. 12 LamaHori ayehlala eSeyiri endulo ^q, kodwa abantwana bakaEsawu bawakhupha emfuyweni yabo, bawachitha phambi kwabo, bahlala endaweni yawo, njengokwenza kukaIsrayeli elizweni lelifa lakhe, iNkosi eyabanika lona ^r. 13 Khathesi, sukumani lina lichaphe isifula iZeredi. Ngakho sachapha isifula iZeredi ^s. 14 Lensuku esahamba ngazo sisuka eKadeshi-Bhaneya ^t saze sachapha isifula iZeredi zaziyiminyaka engamatshumi amathathu lesificaminwembili, kwaze kwaphela isizukulwana sonke samadoda empi sisuka phakathi kwenkamba, njengokufunga kweNkosi kuwo ^u. 15 Ngoba isibili isandla seNkosi sasimelene lawo, ukuwachitha esuka phakathi kwenkamba, aze aphela.

16 Kwasekusithi lapho wonke amadoda empi esephelile esifa esuka phakathi kwabantu, 17 INkosi yasikhuluma kimi isithi: 18 Lamuhla uzakwedlula iAri, umngcele wakoMowabi, 19 lapho ususondele maqondana labantwana bakoAmoni, ungabahlukuluzi, ungalwi labo, ngoba kangiyikukunika okwelizwe labantwana bakoAmoni kube yilifa ^v, ngoba ngilinike abantwana bakaLothi libe yilifa ^w. 20 Lalelo labalwa njengelizwe leziqhwaga. Iziqhwaga zahlala kulo endulo, kodwa amaAmoni bazibiza ngokuthi ngamaZamuzumu ^x; 21 abantu abakhulu, labanengi, labade, njengamaAnaki; kodwa iNkosi yabachitha phambi kwabo, babakhupha emfuyweni yabo, bahlala endaweni yabo ^y, 22 njengalokho eyakwenzela abantwana bakaEsawu, ababehlala eSeyiri, lapho yawachitha amaHori esuka phambi kwabo, bawakhupha emfuyweni yabo, bahlala endaweni yawo kuze kube lamuhla ^z. 23 LamaAvi, ayehlala eHazerimi ^aa kuze kube seGaza ^ab; amaKafitori, aphuma eKafitori, awachitha, ahlala endaweni yawo ^ac. 24 Sukumani, lisuke ^ad lichaphe isifula iArinoni. Bona, nginikele esandleni sakho uSihoni, inkosi yeHeshiboni, umAmori, lelizwe lakhe ^ae; qala ukudla ilifa lalo, ulwe laye empini ^af. 25 Lamuhla ngizaqalisa ukufaka uvalo ngawe lokwesabeka kwakho phezu kobuso bezizwe, ngaphansi kwamazulu wonke, ezizakuzwa umbiko ngawe, zithuthumele, ziqhaqhazele ngenxa yakho ^ag.

26 Ngasengithuma izithunywa zisuka enkangala yeKedemothi kuSihoni inkosi yeHeshiboni, zilamazwi okuthula, zisithi ^ah: 27 Ake ^ai ngidabule elizweni lakho ^aj; ngizahamba ngomgwaqo kuphela, ngingaphambukeli ngakwesokunene loba ngakwesokhohlo. 28 Uzangithengisela ukudla ngemali ukuze ngidle, ungiphe amanzi ngemali ukuze nginathe; kuphela ngizadabula ngenyawo zami, 29 njengalokhu abantwana bakaEsawu abahlala eSeyiri lamaMowabi ahlala eAri benza kimi ^ak, ngize ngichaphe iJordani, ngingene elizweni iNkosi uNkulunkulu wethu esinika lona. 30 Kodwa uSihoni inkosi yeHeshiboni kasivumelanga ukuthi sidlule kuye ^al; ngoba iNkosi uNkulunkulu wakho yenza umoya wakhe waba lukhuni, yenza lenhliziyo yakhe yaba lenkani, ukuze imnikele esandleni sakho, njengalamuhla ^am. 31 INkosi yathi kimi: Bona, sengiqalisile ukunikela phambi kwakho uSihoni lelizwe lakhe; qalisa ukudla ilifa, ukuze udle ilifa lelizwe lakhe ^an. 32 Kwasekuphuma uSihoni ukumelana lathi, yena labantu bakhe bonke, ukulwa eJahazi ^ao. 33 INkosi uNkulunkulu wethu yasimnikela phambi kwethu ^ap; sasesimtshaya lamadodana akhe labantu bakhe bonke ^aq. 34 Ngalesosikhathi sasesithumba yonke imizi yakhe, satshabalalisa wonke umuzi, abesilisa labesifazana labantwanyana; kasitshiyanga insali ^ar; 35 sazithumbela izifuyo kuphela, lempango yemizi esayithumbayo. 36 Kusukela eAroweri esekhunjini lwesifula iArinoni, lomuzi osesifuleni, kuze kube seGileyadi kwakungekho muzi owawuphakeme kakhulu kithi ^as. INkosi uNkulunkulu wethu yayinikela yonke phambi kwethu ^at. 37 Kuphela kawusondelanga elizweni labantwana bakoAmoni, endaweni yonke yesifula iJaboki, lemizini esezintabeni ^au, lakukuphi iNkosi uNkulunkulu wethu esenqabela khona ^av.